Byrek me presh e mish ( Receta gatimi nga Leonora Pane )

Në një tas hidhni miellin, kripën dhe ujë deri sa të zihet brumi, punojeni mirë dhe më pas ndajeni në 12 kulaçka të vogla, mbulojini me një picetë dhe lërini deri sa të bëni gjellën,

në një tigan hidhni vajin dhe mishin të prerë në copa shumë të vogla dhe vëreni të skuqet në flakë mesatare,

pasi të jetë skuqur mishi shtoni preshin e grirë imët, kripën dhe trazojeni vazhdimisht deri sa të skuqet edhe preshi, më pas shtoni salcën,

e pasi t’a keni trazuar 2-3 herë hidhini 2 gota me ujë dhe lëreni të zjejë, kur të jetë tharë uji dhe preshi të ketë zier, hidhni piperin e zi, trazojeni e hiqeni nga zjarri, merni kulaçkat dhe hapini të gjitha në madhësinë e një pjate,

pastaj ndajini 6 vendosini sipër njëra tjetrës duke i lyer me vaj çdo petë, po jo petën e fundit, po ashtu edhe 6 të tjerat, pastaj merni njërën, hapeni në një petë të vetme në madhesinë e tepsisë dhe vendoseni në tepsi pasi t’a keni lyer me vaj, pastaj hapeni dhe petën e dytë dhe lëreni mënjanë,

hidhni gjellën në petën që vutë në tepsi, hapeni në të gjithë siperfaqen e petës dhe vendosni petën e dytë sipër, bashkoni anët e të dyja petëve dhe kthejini si në foto, hidhini vaj sipër byrekut dhe futeni të piqet në 220° për 25 minuta, kur byreku të jetë pjekur spërkateni pak me ujë të ftohtë dhe mbulojeni me picetë e lereni të zbutet. Ju bëftë mirë