Torta Sharlotë ( Receta gatimi nga Fjoralba Seta )

Si fillim, vendosim luleshtrydhet të marinohen për rreth 1 orë në një enë, pasi i kemi prerë në copa të vogla, kemi shtuar lëngun e limonit dhe 2-3 lugë gjelle sheqer. Lëngun që ato do të lëshojnë do ta përdorim për të lagur biskotat savoiardi, ndërsa luleshtrydhet do t’ia shtojmë kremit. Ndërkohë, me ndihmën e një rrahësi elektrik rrahim të verdhat e vezëve me sheqerin derisa të formohet një përbërje kremoze dhe me ngjyrë të hapur, shtojmë dalëngadalë kremin maskarpone duke e përzier me ndihmën e një shpatulle derisa të formohet një masë homogjene. Shtojmë së fundi edhe gjysmën e luleshtrydheve të kulluara shumë mirë nga lëngu i tepërt (ose mund ti kalojmë në mikser) dhe në këtë mënyrë kemi perftuar kremin për të mbushur tortën Sharlotë.

Në një formë torte të rrumbullakët me hapje anash, vendosim vertikalisht njëri pas tjetrit biskotat savoiardi të lagura me lëngun e luleshtrydheve dhe limonit, ndërkohë që shtrojmë edhe bazën me to. Hedhim gjysmën e kremit që përgatitëm më sipër, thërrmojmë disa biskota savoiardi në mënyrë që të formohet një shtresë e hollë biskotash, dhe shtojmë edhe gjysmën tjetër të kremit. Sipërfaqen e dekorojmë me luleshtrydhe të freskëta dhe e vendosim tortën në frigorifer për minimumi 12 orë përpara se ta shërbejmë.